Дали сте пробале топли коктели? Ние прв пат ги пробавме овој четврток. Коктелите се авторски, креирани од Кантина Бар. Според нив поради ситуацијата, се повеќе луѓе сакаат да седат надвор иако е ладно. Затоа бар-експертите смислија топли коктели за да ги стоплат гостите.
Тие ни ги открија и тајните состојки, како и начинот на подготовка, за оние кои сакаат да се обидат да бидат бармени по дома.
Коктелите се викаат Attirante и Run, Forest Run!!
Првиот коктел има појак вкус, на портокал и, како што ни објасни барменот, карактер. Коктелот може да ви изгледа како чајче, но навистина е јак. Затоа што има загреан алкохол и се служи во чаша за коњак. Вториот „Run, Forest Run!!“ од друга страна е полесен за пиење, многу е вкусен и има извонредна декорација. А да, и многу кул име!
Еве како да ги подготвите:
Коктел – Attirante
- Џин
- Мараскино ликер
- Сок од јаболка (бистар)
- Гренадин
Состојките се мешаат и се ставаат во лонче (или ѓезве), потоа се ставаат на оган да се згреат. Не претерувајте, не треба да врие, туку само да се стопли. Резултатот е прекрасен, како чај од јаболко со алкохол. Но, внимавајте да не претерате, се пие мала доза, како коњак.
Креатор: Владимир Поповски од тимот на Кантина
Коктел – Run, Forest Run!!
- Bacardi Oekheart рум (замена, рум)
- Свеж сок од лимета
- Сируп од ѓумбир
- Чај Бора Бора (la cha) (замена овошен чај)
Овој коктел се подготвува различно, ладните состојки се мешаат, а потоа им се додава топол чај. Чајот ќе ги стопли директно во чашата. Повторно, чајчето, ѓумбирот и лиметата ви даваат сладок, пријатен вкус. Како рум со чај, ама многу поубаво! Пијте внимателно.
Креатор: Владимир Поповски од тимот на Кантина
Не знаеме што е подобро, топло или ладно. Затоа ние ги пробавме и двете. Па така третиот есенски коктел е ладен – Burgundi sour коктел со црвено вино. Токму црвеното вино му дава есенска боја и вкус.
Коктел – Burgundi sour
- Амарето ликер
- Свеж сок од лимон
- Црвено вино
- Шербет
- Сок од портокал
- Лед
Ги мешате состојките во шејкер, и ги ставате врз мразот. Повторно внимавајте, вкусот е совршен не е премногу благ, но премногу е вкусен. Виното дава прекрасна нота (неочекувано за нас).
Креаторка: Теодора Николиќ од тимот на Кантина
Доколку не сте убедени во вашите „барменски“ способности, може да направите како нас и да дојдете во Кантина да ги пробате коктелите. Нормално во групи не поголеми од 4ца, со маски и дистанца, желба за добар есенски коктел.
