Како што ја дочекавме новата 2021ва година, така и ќе ја продолжиме. Македонската дизајнерка Ирина Тошева и илустраторката Моки за Ресорт Маврово креираа 2 нови мавровски мини пижама-колекции. Најголема придобивка од седењето дома е удобноста. Но, тоа не значи дека не можеме да бидеме „дотерани“ и да се размазиме со дизајнерски пижамчиња. И додека уметноста го емитира животот, ние би сакале да пиеме топло чајче покрај некој камин во Маврово, носејќи ги овие фенси парчиња.
“Удобноста е од најголема вредност изминатиов период. Првата колекција се состои од два типа пижами, кои освен пријатното чувство од памучниот материјал, како и лежерноста во кројот, делуваат мошне привлечно и елегантно. Горните парчиња може одлично да се стилизираат и да се носат дури и надвор. Украсени се со везени букви од Моки во кирилична и латинична варијанта. Пижамите се достапни во четири бои и четири конфекциски броеви. Остатоците материјал, пак, ги искористивме за маски за очи и вреќички.” – објаснува Ирина Тошева.
Втората мини колекција, којашто дизајнерката ја нарекува “Разгледници од Маврово“, се состои од унисекс блузони и дуксери, со илустрациите на Моки, кои се појавуваат и на перниците и торбичките.
“Низ моите илустрации, на едноставен и суптилен начин се обидов да ги прикажам богатствата што ги нуди Маврово. Смирената атмосфера на цртежите одлично се вклопи со креациите на Ирина Тошева, создавајќи парчиња што се естетски привлечни, но и имаат посебна вредност, затоа што се сувенир којшто долго може да се носи на себе.” – истакнува Моника Стојановска од Моки.
А, ние не би должеле премногу. Уживајте во овие опуштени, зимски фотографии. И ставете вода за чајче или кафенце. За со пижамчињата… А вие, уживајте во оваа cosy галерија.
Фотографиите се на Александра Костадиновска, модел е Кристина Филиповска, а шминката е на Сим Салтирова.
Предлог активности кои одат совршено овој аутфит: серија/филм, добра книга, музиче или омиленото дебатно шоу. Не судиме, вие си знаете. Важно е да уживате.
