Секоја година ги гледаме оние прекрасни планери. Дебели корици, модерни дизајни, прекрасни страници. Не потсетуваат дека новата година е блиску. Повторно имаме можност да планираме подобро, да вежбаме повеќе, да си поставиме нови (или старо-нови) цели. Едноставно ги сакаме, но како се пополнуваат? Секоја страница си има своја приказна. Планирањето со нив, треба да Ви стане навика, еден вид ритуал. Ги прашавме девојките од македонскиот бренд The Daydream.
ПОЧНЕТЕ ТУКА:
МОЈОТ ГОДИШЕН МАСТЕР ПЛАН
На оваа страница напишете ги Вашите најважни цели за 2021 и неколку чекори кои ќе Ви помогнат да стигнете до нив. Дали знаете дека доколку ги ставите Вашите цели на лист хартија: 1) шансите дека ТИЕ ќе се реализираат се пореални отколку ако останат само некаде низ Вашата глава и 2) веројатноста дека ВИЕ повеќе ќе работите кон нивно исполнување е поголема. Поставете си годишни цели, но имајте на ум дека дури и да не се реализираат Вие сте се обиделе, сте ги напишале и сте направиле чекори кон нив.
10 РАБОТИ ШТО САКАМ ДА ГИ НАПРАВАМ ЗА ПРВПАТ
Празните рамки нека бидат дополнителен мотив да остварите барем две од десетте посакувани нови работи. Испечатете и залепете си две фотографии од активностите и тие нека бидат Вашиот потсетник на фактот дека сѐ е можно со малку храброст!
YEAR AT A GLANCE
На оваа страница се впишуваат најважните датуми/моменти/обврски кои се повторуваат низ годините и ги знаете уште од започнување на годината. Родендени, дипломска, венчавка и сите важни долгорочно планирани и закажани настани. Полињата може да се искористат и како deadline за одредена цел која сакате да ја исполните до тој месец во годината што следи. Да, знаеме дека следната година е тешко да се планира, но доволно е да почнете со родендените на блиските. Тоа ќе Ве потсети да им се јавите и да ги израдувате.
МЕСЕЧЕН ПЛАН
Страница пред почеток на секој месец, со цел подобра систематизација и прегледност, целите се поделени во 4 сегменти. Просторот личен раст и книги е оставен на почеток на секој месец како поттик да одвоиме момент, да размислиме и запишеме што ново сакаме да научиме, истражиме и прочитаме.
МЕСЕЧНО ФИНАНСИСКО ПЛАНИРАЊЕ
Да, и ние го мразиме. Но, можеби ќе ни помогне ако пробаме да го сакаме. Планирање на месечниот буџет со дел предвидено за месечна заштеда, нека биде и мала сум која нема да ја почувствувате. На пример ако штедите само по 1000 денари месечно на крајот од годината ќе имате 12 000 денари. Тоа може да значи дополнителни пари за заслужен викенд надвор од градот, купување на квалитетни чизми или капут, купување нешто квалитетно за вашето дете, подароци на крајот од годината за сите (без да останете шворц)… Што и да е што ќе Ве направи среќни.
НЕДЕЛЕН ПРИКАЗ
Ова е тип на планер со неделен приказ. Постојат повеќе видови на планери. Но, како и да е ние мислиме дека неделно планирање е повеќе од доволно. Затоа што сепак ни дава некаква слобода. Левиот дел на страницата е оставен за важни кратки белешки од денот, а десниот дел од денот е за дневните То do обврски кои ги имаме. 😊
Има и дел за белешки на неделно ниво, пет неделни приоритети на фокус, простор за позитивна афирмација – благодарност и причина за прославување оваа недела. Табелата долу десно е habit tracker(следење на навиките) со 7 дневни полиња во кои може да се обележува напредокот и континуитетот на активноста.
ПЛАНЕР ЗА ПАТУВАЊА
Испланирајте да одите некаде. Макар и тоа да е во Македонија, па и да е на еден ден. Ќе Ви даде причина за радост и чувство дека и покрај се, имате слобода. А, кога ќе помине оваа ситуација дополнете ги датумите за земјите кои сакате да ги посетите.
Планерот е одличен подарок, за себе или за некој близок. А, еве како изгледаат најновите планери на овој македонски бренд.
Периодов кај nea.mk поддржуваме македонски продавачи, претприемачи, дизајнери и занаетчии. А и Вие може да го направите тоа, така што ќе купите нивен производ, наместо производ од некој светски гигант. Во оваа криза сите сме заедно и треба да си помогнеме, и заедно да излеземе од истата.
