Тоа што сме дома во 19:30 ни остави време да направиме некои работи кои порано само сме си ветувале. Дел од нив е и правењето на домашни маски и пилинзи. Секогаш ме привлекувала идејата дека маската која ја имам на лице е безбедна за јадење. Секако дека нема да ја изедам, но едноставно ми звучи кул. Еден од најпознатите домашни пилинзи е токму тој со кафе. Позитивното е дека може да се користи и за лице и за тело, а тоа и го направив со првата доза.
Еве што Ви е потребно:
- Кафе
- Шеќер (крупен секако)
- Маслиново масло
- Кокосово масло (стопено)
Мерките зависат од количината која ви е потребна. За лице е доволно да користите по 1 лажичка од се. Може да се користи повеќе од еднаш неделно, но не повеќе од три пати. Ова е зависно од типот на кожа.
Подготовка:
Се мешаат кафето и шеќерот (ова е единствена прилика во која мешам шеќер со кафе, во спротивно истото го сметам за богохулуе). Потоа се додаваат маслата. Кокосовото масло, може да го замените и со друго масло кое го користите. Ќе се добие малку смешна кафена смеса.
Употреба:
Смесата ја мачкате на лицето како маска. Доколку имате посува кожа можете да ја оставите малку за да ги упие маслата. Потоа почнувате со нежно масирање правејќи пилинг на кожата. ВНИМАНИЕ: Овој чекор правете го или над лавабо или во када бидејќи кафето ќе почне да се рони. Кога ќе почувствувате дека е доволно и кога ќе се впие најголемиот дел од маслото исплакнете со млака вода. Потоа исплакнете и со ладна вода. За додатен ефект на намалување на порите и циркулација може да го поминете лицето со коцка лед. Јас си го викам овој третман Ice Coffee третман, вие викајте си го како сакате. По некое време намачкајте си нежна хидратантна крема. Кожата после овој мини третман е навистина премазна. Сепак, доколку имате проблематична и осетлива кожа или акни консултирајте се со вашиот дерматолог или козметиколог.
Пилингот може да го користите и на тело, се верува дека кафето помага во намалување на целулитот. Од моето искуство главен противници на целулитот, сепак остануваат: здравата и чиста исхрана, пиењето вода, спортот и анти-целулитните масажи. Но, секогаш е добра идеја да имате и одлична, свиленскаста, Ice Coffee, кожа.
Доколку преферирате да си ја купите коземтиката, одличен пилинг од природни состојки на база на кафе е Your Secret Crush пилингот. Тајна „симпатија“ уште од неговата појава на македонскиот пазар.
