Сите зборуваат лошо за неа. Сакаат да се отарасат од неа. Неа, воопшто не ја сакаат… Сепак, ние мислиме дека таа 2020тата многу не научи. И ние немаме многу високо мислење за неа, но таа не’ потсети на се што е навистина вредно. Да се грижиме за здравјето. Да се гледаме најмногу што можеме со блиските. Да се сакаме, гушкаме и дружиме секогаш кога можеме. Се надеваме дека сето ова ќе биде возможно со новата 2021! За НЕА, имаме високи очекувања. Дали ќе ги оствари, ќе дознаеме од утре. Кога за првпат ќе се запознаеме со неа, со 2021.
Да бидеме реални и во 2020та ние бевме одлични! Секогаш сме. Во 2021, повторно ќе бидеме свои, бесни, мирни, паметни (со по некоја не толку паметна одлука), интересни и досадни – едноставно прекрасни! Се надеваме набргу ќе можеме да бидеме и заедно. Реално. Со прегратки, бакнежи, солзи и насмевки.
Е сега, за 2020та не можеме да кажеме дека беше одлична. Па така се што треба да направи 2021ва е да не биде како претходната. Интересно е дека бројот 21 е бројот на ризикот, неизвесноста, коцкањето и фрлањето коцка. Соодветно на тоа и во 2021 немаме поим што ќе се случи. Влегуваме во неа со ризик.
Можеби ќе биде прекрасна година на блискост и љубов. Можеби ќе биде уште полоша, а можеби и ќе понуди минимално подобрување. Не знаеме. Единствено што знаеме е дека почнува утре. А ние ја почнуваме со надежта со која коцкарот ги фрла коцките мислејќи дека токму овој „зар“ ќе биде добитен. Нека биде подобра, нека биде наша. Доколку не е, ќе дојде следната.
Ние секако сме класични кралици, со самото тоа што стигнавме до тука. Го читаме овој текст, повторно се надеваме и правиме се што можеме да бидеме најдобрата верзија од себе. На моменти и во следната година нема да бидеме баш најдобрата верзија… Ќе бидеме најлошата, или некоја просечна верзија од себе. Важно е да си останеме верни на тоа што сме.
Ние од nea.mk ви ветуваме дека ова останува нашето онлајн местенце за дружба и во 2021вата. Адреналинот кој го чувствуваме во моментов, како што излегуваме од 2020тата нека биде за добро. Следната да биде година на здравје и многу заеднички моменти. Да се сретнеме во некое преполно диско, на концерт, во кафуле или кафанче и од срце да се изгушкаме. Се надеваме дека наскоро ќе бидеме заедно и во реалниот свет. Дотогаш се дружиме виртуелно кај nea.mk
Со љубов,
Од НЕА ✨
