Покрај сериозната ситуација кога е вирусот во прашање, овој 1-ви Април го задржуваме правото да бидеме несериозни. Најчести шеги се: „Ау, нешто си извалкана“, „Леле, огромен пајак имаш на косата“… и слично. Не веруваме дека овие две сеуште фукнционираат, но важен е контекстот и времето кога е кажала лагата. По неа следи весело „Априлили!“. Спомени на детство веднаш ни се враќаат во глава. Шарените маски и натпреварот „која маска е најубава, најсмешна, најоткачена…“ беа заштитен дел од училишниот ден на 1-ви Април. Денот на шегата е еден од најзабавните празници. Би сакале да ги поздравиме и сите возрасни кои се маскираат за овој ден и остануваат деца. Не, никогаш не е предоцна за шега и добра маска. Во некои нормални времиња дискотеките би биле преполни со добри маски и не толку добри шеги направени на шанк.
Но, зошто го славиме 1-ви Април?
Според Википедија: Во најразлични земји од целиот свет, Денот на шегата секоја година се слави на 1 април. Понекогаш го нарекуваат и денот на сите шегаџии. 1 Април не е национален празник, но секаде се прославува како ден кога многумина прават разни шеги и будалаштини. Овој ден го одбележува присуството на весели или други шеги, трикови и други практични шеги на различни пријатели, членови на семејството, наставници, соседи, колеги итн. Традиционално, во некои земји како Канада, Нов Зеланд, Обединетото Кралство и Јужна Африка, шегите траат само до пладне и некој кој прави трикови после пладне го нарекуваат „Априли-ли-ли“ и го исмејуваат. Во други земји како Франција, Италија, Јужна Кореја, Јапонија, Русија, Холандија, Германија, Бразил, Ирска, Австралија и САД шегите траат цел ден. Во Франција и Италија децата ( и возрасните, кога е соодветно) традиционално на грбовите еден на друг си лепат риби од хартија. Најраната врска помеѓу Први април и шегата може да се најде во Кантербериските приказни на Џефри Чосер (1932). Многу писатели претпоставиле дека зад создавањето на овој празник стои враќањето на Први јануари како Нова Година, но оваа теорија не објаснува некои поранешни тврдења.
Една од првите регистрирани првоаприлски шеги, се случила многу одамна, во 1713 година, кога Џонатан Свифт, автор на Гуливеровите патувања, објавил дека на 1 април еден од погубените криминалци ќе се врати од мртвите за да се напие пиво во локалниот паб. Тој ден пабовите биле преполни со луѓе што дошле да го видат „мртовецот како консумира пиво“.
Зошто го славиме не знаеме, но дефинитивно уживаме во тоа барем на еден ден да бидеме нешто друго. Па, иако сте дома никој не ви брани да се маскирате. А доколку не се маскирате, барем излажете ги најблиските или кажете некоја шега. Лоши вицови денеска се прифаќаат, а и лоши шеги.
ВНИМАНИЕ: Можеби шегата дека „Овој 1ви Април сите носат маски“, беше интересна минатата година, но повеќе не е.
