Новата година ќе ја прославиме во пижами, дома. Дали е тоа нешто лошо? Не, ама не е ни нешто особено. Како да го одбереме аутфитот за најлудата ноќ? Да ја завршиме 2020та со стил. А под стил подразбираме светкави пижами, смешни пижами, пижами и високи потпетици… Еве ги нашите предлози.
Стил 1
Пижама парти со врзана маичка и светкави долни пижами. Ако сакате да се дотерате ова е одличен стил. Ќебенцето е дополнителен момент кој секако ќе ни биде корисен. Така светкави и со голо меше, ќе си легнете пред телевизор, и ќе си се покриете. Не е новата година која ја сакавме, но тоа е она што го имаме. И некако е кул.
Стил 2
Ако сте амбициозни може да си ја средите и косата. Облечете елегантни црни пижами со точки, украсете го домот и уживајте. Макар и сами. Ако нешто не научи 2020та, тоа е дека мора да уживаме во сопственото друштво.
Стил 3
Бело. Прекрасно, чисто и новогодишно. Снег не знаеме дали ќе имаме, но и да нема ние можеме да бидеме снежни кралици. Дома сме, и се е дозволено.
Совет: Внимавајте со црвеното вино. Доколку се потурите, веќе го знаете принципот, црвено вино се вади со бело вино. Не сме сигурни колку функционира, ама така не учеле.
Стил 4
Одлично време да го вратите детето во себе. Па, доколку одбивате да носите сериозен аутфит за Нова година која секако ја славите во пижами, еве одличен начин. Одберете откачени пижамчиња, со интересни новогодишни апликации. Овие подолу се слатки, има и посмешни пижамчиња, најважно е да се забавувате!
Стил 5
За оние кои сакаат да и водат инат на Короната, може да носите високи потпетици и елегантен аутфит налик пижами. Единствено неудобно нешто се потпетиците. Сепак ги сакаме, па ќе си ги носиме. Се останато во оваа модна комбинација е пријатно и прекрасно.
Годинава дефинитивно си поигра со нас. Ниту една прослава не е онаква како ја знаеме, па нема да биде ниту новогодишната. Најважно е да останеме здрави. А, за останатото, со малку креативност може да имаме навистина интересна новогодишна ноќ. Времето ќе биде совршено за излежување, па облечете ги омилените пижами и направете си коктел или наточете винце. Огнометите ќе ги гледаме низ прозор, гушнати со омиленото кебенце, или омилените личности.
