Grooming салоните, или салони за разубавување на милениците се тренд во светот кој е се поприфатен и кај нас. Па така може да видиме слатки пудлици со фризурче, исчешлани и украсени миленици со средени ноктиња и долги негувани „коси“. Одлучивме да се распрашаме на тема Grooming кај Јована Трајкоска, сопственичката на Тhe Groom Room. Која ги направи овие преслатки фризурчиња подолу.
Какви услуги им се нудат на нашите најдобри (и најслатки) пријателчиња?
Се од темелно расчеткување на заплеткани миленици, бањање со повеќе типови на шампони, фенирање, шишање со машинка или со ножици зависно од желбата на сопственикот. Работиме стилизирање на влакното, чупање на влакната од ушите на милениците и нивно чистење, како и сечење и турипјање на ноктите. Добредојдени се сите видови на миленици без разлика на нивниот вид, големина и карактер.
Какви се цените, конкретно во вашиот салон?
Што се однесува до цените, тие варираат зависно од големината на животното, колку
работни часови се потребни за да се сработи истото, и типот на услуга која ја бара сопственикот. Ценовникот попрецизно можете да го разгледате на нашата веб страна
www.groomroom.mk. Бидејќи пред се сме активисти, за бездомните миленици во нашиот салон постои попуст во вредност од 50% на цената.
Кога е може да се почне со grooming?
Може да се почне со груминг третмани од мала возраст, веднаш после примените
вакцини. Во овој случај милениците полесно го прифаќаат целиот процес и на нив им претставува задоволство, а не стрес, а со тоа се и помирни.
Јована, знаеме дека си активистка за правата на животните со години, но како дојде до идеја да отвориш ваков „салон за убавина“?
Веќе 6 години работам во оваа област. Почнав во реномиран Grooming салон каде работев уште додека студирав психологија. Па така научив се од шишање и стилизирање до справување со најразлични карактери кои ги имаат милениците. Тоа ми овозможи да стекна и искуство и самодоверба за отворање на сопствен салон. Ме радува дека кога ќе завршиме и милениците и сопствениците си одат дома посреќни.
Благодариме и се надеваме дека ќе имаш уште многу слатки, средени клиенти.
