Колку пати сте почнале со некоја диета, и по 3-4 дена сте ја прекинале? Колку пати сте си ветиле дека конечно ќе се храните здраво, но тоа останало само на верување? Ние многу.
Во ова брзо време во кое сме оптеретени со многу обврски навистина е тешко добро да се храниме. Добрата исхрана не е изгладнување (тоа е спротивно на добра исхрана). Таа треба да биде долгорочна, па согласно на тоа не е ниту откажување од се што ни е омилено. Добрата исхрана претпоставува дека најголемиот дел од времето ќе се храниме здраво и умерено.
За да го направиме тоа треба да престанеме да ги правиме следните грешки: прејадување и прегладнување. Едното води кон другото. На пример: доколку се прегладниме на работа, а немаме план што ќе јадеме потоа, најверојатно ќе се прејадеме во вториот дел од денот. Храната која ја внесуваме кога немаме план, а сме прегладни често се сведува на мнооогу паста, тост или нешто слично. Брзо и калорично.
Па, како да не ја уништуваме исхраната?
Еве неколку совети:
Направете список на оброци за неделата.
Седнете и напишете што ќе јадете за појадок, што за ручек (додека сте на работа), а што за вечера (по работното време). Дополнително подгответе и список на здрави ужинки кои ќе ви бидат при рака, доколку сте прегладни до следниот оброк. Испланирајте ја и соодветната количина.
Подгответе оброци однапред.
Откако ќе го направите списокот, може дел од истиот да подготвите. На пример, може да подготвите стек, благ компир, киноа… и слични додатоци за салата. Може да ја измиете и исецкате салата. На овој начин само ќе треба да ставите во сад и да зачините. Нешто кое нема да ве замрзи да го правите пред работа.
Реално испланирајте го времето за готвење.
Не си ветувајте дека ќе јадете оброк кој треба да се подготвува со часови за време на работната недела. Тоа нема да се случи. Испланирајте оброци кои брзо се подготвуваат, а се здрави. Со оглед на тоа што сте јаделе на работа ќе може да издржите истите да ги поготвите. Дозволете си оние денови кога сте презафатени да купите нешто за носење.
Дозволете си задоволство.
Најчесто грешиме затоа што нашето омилено јадење едноставно го нема во диетата. Затоа откако две недели ќе издржиме, третата се давиме во паста, слатки и сендвичи. Подобрата опција е планирано да си дозволиме некој убав оброк. Тоа ќе ни даде до знаење дека не е крај на светот. Се храниме добро, за себе, но тоа не значи дека никогаш веќе нема да пробаме пица. Дополнително останатите здрави оброци нека Ви бидат вкусни. Барем денеска на интернет можеме да најдеме милиони здрави, вкусни и брзи рецепти.
Се надеваме дека ви помогнавме. Среќно девојки!
