Некое време откако заврши и последната сезона на Преспав одлучивме да пишуваме за темите кои серијата храбро ги обработува. Една од нив е отворениот брак. Тема за која знаеме, се шушка, но ретко навистина се зборува. Во дел од епизодите главните ликови Ула и Коста одлучуваат да го отворат бракот. Отворен брак најчесто значи своевидна дозвола за партнерите да комуницираат и да имаат сексуални или други односи со некој кој не им е партнер. Тоа не е моногамна врска, затоа што најчесто овие односи треба да бидат површни, односно да не влијаат на бракот. Тоа би била „идеалната“ замисла за отвореноста на бракот. Но, колку е тоа возможно? Не е наше да судиме, ниту пак мислиме дека било чија работа освен на брачните партнери/другари. Сепак, инспирирани од Преспав одлучивме да побараме мислење од психолог на оваа тема.
„Ако зборуваме за концептот отворен брак тогаш треба за земеме предвид дека живееме во општество кое е традиционално и конзервативно во однос на бракот и брачната заедница. Верувам дека пласирањето на ова прашање во Преспав ќе отвори интересна дискусија, која е ретка кај нас. Сосема е во ред да се согласиме дека не се согласуваме дека отворениот брак е прифатлива за сите. Работејќи со клиенти, отворениот брак (или врска) почесто сум го слушала кај клиентите од странство отколку кај нас. Отворен брак се случува кога двајцата партнери стапуваат во однос (сексуален или емотивен) со лица надвор од брачната заедница. Притоа двајцата пртнери се согласни и информирани за тоа. Колку функционира? Па не може да се каже дека секогаш функционира. Додека за некои партнери тоа точка на баланс, кај други предизвикува болка и најпосле разделба. Тука се наметнува прашањето дали е правилно? Возрасните личности сами носат одлуки за тоа како ќе го градат својот живот. Се додека никој не е доведен во опасност, кои сме ние да кажуваме на што е правилно? Дали е можно неверство во отворен брак? Не во таа форма. Но можни се лаги, љубомора и болка. Како и во секој друг љубовен однос.“ – објаснува за nea.mk психологот Бојана Петровска (Мој Психолог).
Секој си ја крои својата среќа, па така и Вие. Најважно е доколку имате блиски кои се одлучиле за нешто слично да не ги судите. Дајте им љубов и поддршка и дозволете им да ја најдат својата среќа на начинот на кој им одговара.
