Оваа година секој ќе си ја декорира својата маса. Со ограничувањата ќе останеме во тесниот круг на најблиските. Сепак, масата може да изгледа волшебно и интересно. За дополнителна забава, доколку дома сте повеќе од еден, вклучете ги сите во декорирањето. Карантинот изгледаше како добра идеја, кога мислевме дека ќе трае еден месец. Но во последно време се сведува на седење на телефон, гледање серии, гледање филмови, читање и други статични активности.
Правење на празнична трпеза може да биде интересен начин за дружење и креирање на домашни традиции. Тешко е да се одолее на празничниот дух, па дури и во вакви времиња. Еве неколку интересни начини како да ја направите трпезата поинтересна. А, на крајот од овој текст има и видео, со детални објаснувања.
Салата
Главниот трик за салатата да изгледа магично е да содржи повеќе бои. На пример, доколку основата е зелена, додадете парченца домат, или малку калинка за црвена боја. Потоа, може да додадете сиренце за бела. Доколку сакате експерименти додадете суви овошја за портокалови и темни тонови. Истото може да се постигне и со додавање на оревчиња и/или јатки. Сосот додадете го во подолните слоеви (за вкус), а најгоре само пропрскајте. Може да играте и со формата. Од класична форма во длабок тањир, до мали порции со уредно наредени листови од салата. Погледнете ги фотографиите, а и видеото подолу за многу нови идеи.
Главно јадење
Божиќ е првиот ден кога оние кои постат можат да јадат мрсна храна. Важно е да не се претера, бидејќи лесно може да дојде до прејадување. Моравме да ве предупредиме. Најчесто главното јадење е печено месо со компир или некој друг прилог. Па така ги одбравме и овие празнични декорации. Добра идеја за послужување на печеното месо е користење на голема дрвена даска на која ќе исечете неколку парчиња, а останатото ќе го оставите во целина. Даската може да се декорира со расфрлани компирчиња и малку магдонос.
Секако, доколку сакате да правите посебни порции, има многу интересни идеи и за тоа. Пирето е добар начин да се размрда чинијата. Погледнете ги фотографиите и видеото за идеи.
Десерт
„Уф. Не можеме десерт. Се прејадовме… Добро, ајде да пробаме само.“ – лага која си ја кажуваме секоја година. Има едноставни начини да направите вашиот десерт да изгледа како да чини милион долари. Погледнете ги видеата за многу идеи. Некои трикови, се толку лесни а ефектни што ќе ви биде криво како не ви текнале порано. Имајте на ум дека рестораните прават многу храна, па така декорирањето е брзо и прецизно (а со самото тоа и не е премногу тешко).
Погледнете ги видеата за повеќе идеи. Ние навистина се инспириравме. Слободно пратете ни и фотографии од сервирањето. Да го направиме инстаграм малку поразигран оваа година, со нашето креативно сервирање. Уживајте и играјте си!
Неколку едноставни начини за да декорирате чинија како вистински мастер-шеф! Дополнителен бонус е тоа што секој ќе си добие своја чинија.
