Едногодишно растение кое што има богата историја и географија и се консумира во разни форми и манџи. Малите зелени топчиња кај нас се најбарани околу нова година, бидејќи одат во комплетот за руска салата. Исто така може да се сретне во некое тенџере, скоро секогаш во придружба на некаков вид месо.
Грашокот е потценет зеленчук најчесто познат како мис хотелски прилог, манџата што децата ја избегнуваат, сличен однос како и боранија. Секогаш ми е забавно да чистам грашок и да го готвам на разни начини. Како што стареам се повеќе ја ценам флексибилноста на грашокот и можностите што ги нуди за магична преобразба во разни облици, од манџа до супа.
Од неодамна сум заљубена во пире од грашок и тоа во различни варијанти и конотации. Во фрижидер имав Грашок и благи компири (еден бел и еден лилав) главица кромид удавена во цвекло и пробав да ги искомбинирам.
Денес бев кралица на пирето, решив денес нема месо!
За пире:
500 гр грашок
1 лилав компир
1 бел компир
100 мл млеко или павлака
(за готвење или кисела)
30-40 гр путер
1 чешне лук
2-3 зрнца сечуан бибер ( ако немате – да сте живи и здрави)
2-3 зрнца мешан бибер – црвен и црн
За салата:
Рукола, валеријана, млад спанаќ, калинка, праз,потпечени семки од тиква и сончоглед, балсамико крема, масло од семки од тиква, мак, сол, бибер.
Одделно се варат грашакот и компирите. Грашокот се вари со сите бибер, лук и сол. Сладкиот компир се вари без зачин и без лушпа. Со пасатор се пристапува кон исцедениот грашок и за време на пасирање се додава парче путер и дел од млекото или павлаката.
Истата процедура ја повторуваме со компирите, едниот па другиот и се добиваат 3 бои на пире кои што може да се комбинираат заедно или засебно. Комбинацијата на пире од грашок и пире од компир ми е фантастична и ќе ја практикувам почесто. Освен што е вкусна, многу е ефектна за гледање. Боите се прекрасни.
Кога пирето е готово може да го послужите со убаво испечен Јагнешки котлет или со парче пилешко или моето омилено, крцкава пржена сланина – панцета.
Бидејќи решив да имам безмесен ручек, моето пире беше во придружба на лесна салата од рукола со валеријана, калинка, тркалца праз,зрнца мак и семките, пропрскани со балсамико крем, масло од тиква, сол и бибер.
Имав главица кромид што ја давев во теглата со цвекло, ја искомпонирав со пирето.
Грашокот да си го имате на трпеза почесто, убав е, лесен е за работа и може да се трансформира многу лесно.
Исто така практикувајте да имате 2-3 дена во неделата без месо. И планетата и телото ќе ви бидат благодарни.
