Споделувајќи поучни цртани и содржини од светот, одлучивме малку да разгледаме што се нуди дома. Така дојдовме до Биби и нејзината дужина од „Светот на Биби“. Се работи за серијал на цртани за деца од претшколска возраст, па и рана училишна возраст кои се поучни и интересни.
Децата ги обожаваат, а за тоа зборуваат и милионите прегледи на цртаните на YouTube. Според тимот на креатори целта е да се вратат децата над книгата. Главниот лик Биби чита сказни, таа сака да учи, љубопитна е и добра личност. Заедно со нејзиниот пријател Боби, минуваат низ најразлични авантури, а секоја од нив завршува со некаква поука за гледачите.
Дел од тимот се писателката Билјана Црвенковска, илустраторот Тхе Мичо, режисерот Гоце Цветановски, а препознатливите гласови се на актерите: Слаѓана Вујошевиќ (Биби), Сашко Коцев (Боби), Сашка Димитровска (Мама Ана). Цртанот веќе ја освои Европа, а доби и награда на фестивалот во Лил Франција. Доказ дека и публиката ги обожава е тоа што сликовниците секој година се на врвот на најчитани и омилени кај публиката. Годинава тие го имаа и првото и второто место на „Readers Choice“ во категоријата детска литература. И тоа прва е „Бонтон за деца“, а втора „Приказните на мама Ана“.
Биби зборува литературен македонски јазик, учејќи ги новите генерации за истиот. Покрај цртаните има и песнички, но и многу други содржини. Имено, цел тим на едукатори работи и на создавање на едукативни игри, преку кои децата поминуваат квалитетно време со родителите учејќи.
Секако, новогодишните празници годинава ќе бидат во кругот на најблиските, дома. Па така, овие новогодишни видеа, содржини, пакетчиња и игри можат да им помогнат на децата да го почуваствуваат новогодишниот дух!
На платформата edukacija.svetotnabibi.mk може да ја најдете најновата песничка – Џингл Белс на Зазулски, најновата сказна „Подароците од планетата Заз“, а на 31.12 најавуваат и 25 минутна новогодишна емисија со цртаните ликови. Навистина интересно друштво за малку понаква нова година. Или што би рекле Боби и Биби: Јипи Рипи, Јееј!
Во продолжение една песничка која нема да Ви излезе од глава:
