Не сме сигурни дали е вака низ цела Македонија, но во Скопје е тмурно, дождливо утро. Одлучивме да го разубавиме со некои од најлегендарните дуети на сите времиња. Овојпат се одлучивме за песни отпеани на англиски јазик, а набргу и ќе следи и македонска верзија. Уживајте, играјте и исплачете се (ако тоа ви го дозволува работното место), со овие незаборавни песни:
I got you babe – Sonny and Cher
Најпознатиот пар на ’60 и ’70 Сони и Шер имаат повеќе дуети, но овој најмногу ја отсликува нивната љубов. Песната помина 3 недели на врвот во САД во 1965 година. Љубовната балада стана омилена на хипи генерацијата. Погледнете го црно-белото видео и ќе ви стане јасно зошто тие двајца се еден од најзаљубените парови што некогаш се појавиле на музичката сцена.
(I’ve had) The time of my life
Bill Medley and Jennifer Warnes – Пред извесно време Black eyed peas, искористија дел од оваа песна за нивната The time, но зборовите “I’ve had the time of my life”, засекогаш ќе се поврзуваат со Dirty dancing, филмот од 1985. Доказ за тоа колку е одличен овој soft-rock хит е и освоениот Оскар во 1987 година. Вонвременски дует!
You’re the one that I want
John Travolta and Olivia Newton John – Никогаш доста од овој дует, тогаш, сега и засекогаш. Соработката на ѕвездите од Grease, ја искачува песната на врвот помеѓу стоте песни во јуни 1978. „You’re the one that I want“ и „Summer nights“, прават саундтракот за филмот да биде еден од најпродаваните низ времето, па и сега.
Something stupid – Nancy Sinatra and Frank Sinatra
Верувале или не Frank Sinatra воопшто не ја сакал оваа песна, без разлика на тоа што била помеѓу најслушаните 10 во тоа време. Оваа и „These boots are made for walking“, се најпознатите песни на Ненси, воедно и единствените нејзини коишто се наоѓаат на топ листите. Интересен факт е дека овој дует е единствениот татко-ќерка дует којшто се искачува на врвот во САД и таму се задржува четири недели.
Shallow – Lady Gaga and Bradley Cooper
Водечки сингл од саундтракот за филмот на којшто веројатно многу девојки се изнаплакале – A star is born (има и постари верзии од овој фантастичен романтичен филм, ѕирнете ги). Песната ги собра најдобрите критики секаде низ светот. Доби и мноооогу награди меѓу кои и Оскар за најдобра песна.
Имајте убав ден, драги читателки и читатели.
